लाईभ प्रदेश
सल्यान, ११ जेठ।
दाङको तुलसीपुर–सल्यान सडकखण्डअन्तर्गत कपुरकोट गाउँपालिका–३ लामीडाँडामा भएको जिप दुर्घटनामा घाइते भएकामध्ये एक महिलाको उपचारको क्रममा निधन भएको छ।
सल्यानको कपुरकोट–५ रिमकी ६२ वर्षीया भीमा बुढाको नेपालगञ्जस्थित नर्सिङ होममा गएराति १ बजे उपचारकै क्रममा मृत्यु भएको जिल्ला प्रहरी कार्यालय सल्यानका सूचना अधिकारी प्रहरी निरीक्षक बाबुराम बस्नेतले जानकारी दिनुभयो।
लु १ ज १६३७ नम्बरको उक्त जिप रिमबाट तुलसीपुरतर्फ जाँदै गर्दा हिजो दिउँसो साढे १ बजे लामीडाँडा नजिकै सडकबाट झण्डै ४ मिटर तल खसेर दुर्घटनामा परेको थियो।
दुर्घटनामा परी गम्भीर घाइते भएका ६ जना बिरामीमध्ये ६७ वर्षीया मञ्जिता बोहरा, ३८ वर्षीय विजय बुढाथोकी, ४६ वर्षीया सिता बुढा, १५ वर्षीया सपना बुढाथोकी र ५५ वर्षीय गोरेलाल बोहराको अहिले नेपालगञ्जमा उपचार भइरहेको छ। उनीहरूलाई तुलसीपुरस्थित राप्ती प्रादेशिक अस्पतालमा प्रारम्भिक उपचारपछि थप उपचारका लागि नेपालगञ्ज रिफर गरिएको हो।
त्यसैगरी, सामान्य घाइते ४५ वर्षीया चन्द्रकला महतारा, १८ वर्षीया पुष्पा महतारा र ८ वर्षीया रोशनी महतारा भने उपचारपछि घर फर्किएका छन्।
जिप चालक कपुरकोट–५ निवासी ३७ वर्षीय ज्ञानबहादुर महतारालाई प्रहरीले नियन्त्रणमा लिएको छ। घटनाको थप अनुसन्धान भइरहेको प्रहरीले जनाएको छ।
