लाईभ प्रदेश
तुलसीपुर, १४ जेठ ।
दाङ जिल्लाको तुलसीपुर उपमहानगरपालिका–३ स्थित सिरखोलामा एक पुरुषको शव फेला परेको छ। इलाका प्रहरी कार्यालय तुलसीपुरका अनुसार आज बुधबार बिहान करिब ७:२० बजे स्थानीयले शव देखेपछि प्रहरीलाई खबर गरेका थिए।
प्रहरीका अनुसार शव अत्यधिक गलीसकेको अवस्थामा भेटिएको हो। इलाका प्रहरी कार्यालय तुलसीपुरका प्रमुख डिएसपी अनिल ठकुरीका अनुसार शवको टाउको र खुट्टा गली छुट्टिएको अवस्थामा भेटिएको छ। शवको अवस्था हेर्दा करिब डेढ महिना अघि मृत्यु भएको अनुमान गरिएको छ। अत्यधिक गलीसकेको हुँदा मृतकको उमेरसमेत निर्धारण गर्न कठिन रहेको डिएसपी ठकुरीले जानकारी दिनुभयो।
घटनास्थल नजिकै रहेको बंगुर फार्ममा कार्यरत कामदारले शव देखेपछि प्रहरीलाई जानकारी गराएका थिए। प्रहरीले घटनास्थलबाट शव उठाई राप्ती प्रादेशिक अस्पतालको शवगृहमा राखेको जनाएको छ।
हाल घटनाबारे थप अनुसन्धान भइरहेको प्रहरीले जनाएको छ।
