लाईभ प्रदेश
तुलसीपुर ७, असार ।
दाङको तुलसीपुर उपमहानगरपालिका–२, पोटलीस्थित सडकखण्डमा असार ६ गते साँझ ८ बजेतिर सवारी दुर्घटना हुँदा दुई जना घाइते भएका छन्। तुलसीपुरबाट पश्चिमतर्फ गइरहेको रा ३ प ५९३० नम्बरको मोटरसाइकलले पैदल यात्रीलाई ठक्कर दिँदा दुर्घटना भएको हो।
दुर्घटनामा मोटरसाइकल चालक शान्तिनगर गा.पा.–५ का २७ वर्षीय विनोद बिक र पैदल यात्री तुलसीपुर–१ का ४९ वर्षीय निर्मल शाह घाइते भएका छन्। चालक बिकको टाउको तथा हातखुट्टामा चोट लागेको छ भने शाहको बायाँ खुट्टामा चोट लागेको जनाइएको छ। दुवैको अवस्था मध्यम रहेको र राप्ती प्रादेशिक अस्पतालमा उपचार भइरहेको प्रहरीले जनाएको छ।
दुर्घटनापछि मोटरसाइकल इलाका प्रहरी चौकी बालापुरको नियन्त्रणमा रहेको र घटनास्थलमा प्रहरी निरीक्षक डिल्लीराज मल्लको टोली परिचालन गरिएको थियो। दुर्घटना स्थल बालापुर प्रहरी चौकीबाट करिब ४ किलोमिटर पश्चिम पर्छ।
