rita kc
घाेराही १२ चैत ।
दाङको घोराही उपमहानगरपालिका–९ खैरा स्थित सांग्रिला प्लाई उद्योगमा सोमबार राति करिब १ बजे अचानक भिषण आगलागी भएको छ। आगो लागेको १२ घण्टा बितिसक्दा पनि पूरै नियन्त्रणमा आउन नसकेको स्थानीय प्रशासनले जनाएको छ।
जिल्ला प्रहरी कार्यालय दाङका अनुसार आगो निभाउने प्रयास जारी छ। दाङका प्रमुख शहरहरू घोराही, तुलसीपुर, लमहीसहित बर्दियाको बाँसगढी, बाँकेको कोहलपुर, कपिलबस्तुको शिवराज, रुपन्देही लगायतका ठाउँहरूबाट सात वटा दमकल झिकाइएको छ।
उद्योगमा ठूलो परिमाणमा प्लाईउडका सामग्रीहरू रहेका कारण आगो नियन्त्रणमा अप्ठ्यारो परेको छ। आगलागीको कारण अझै स्पष्ट नभए पनि प्रारम्भिक अनुमानअनुसार करोडौंको क्षति भएको अनुमान गरिएको छ।
नेपाली सेना, नेपाल प्रहरी, सशस्त्र प्रहरी, र स्थानीय बासिन्दाहरू आगो नियन्त्रणमा जुटिरहेका छन्। सात विघा क्षेत्रफलमा फैलिएको यस उद्योगमा करिब ५०० जना कर्मचारी कार्यरत रहेको जानकारी गराइएको छ।
भाग्यवश, हालसम्म मानविय क्षति नभएको पुष्टि भएको छ। उद्योगका अधिकांश कर्मचारी आइतबार विदामा भएकाले आगलागीको समयमा उद्योगभित्र कोही नभएकोले ठूलो जनधनको क्षति टरेको मानिएको छ।
स्थानीय प्रशासनले आगलागी नियन्त्रणमा लिन अझै केही समय लाग्न सक्ने अनुमान गरेको छ। घटनास्थलमा थप सुरक्षाकर्मी र उद्धार टोली खटाइएको छ भने आगलागीको वास्तविक कारण र क्षतिको विवरण संकलन भइरहेको छ।
