rita kc
काठमाडौँ, २३ चैत ।
मोरङ, बैतडी र सप्तरी जिल्लामा भएका फरक–फरक सवारी दुर्घटनामा परेर तीन जनाको मृत्यु भएको छ।
मोरङ – रतुवामाई नगरपालिका–६ त्रिभुवन चोकमा शुक्रबार राति मोटरसाइकल दुर्घटना हुँदा चालक सोम टुडु (४२) र उनकी श्रीमती वामनी हेमरम (३५) को ज्यान गएको हो। रंगेली अस्पतालमा उपचारका क्रममा दुवैको मृत्यु भएको प्रहरीले जनाएको छ।
बैतडी – दशरथचन्द नगरपालिका–११ मा बोलेरो जिप दुर्घटना हुँदा पञ्चेश्वर गाउँपालिका–५ का ५४ वर्षीय चंचले दयालको मृत्यु भएको छ। उनलाई गम्भीर घाइते अवस्थामा जिल्ला अस्पताल लगिएको थियो, तर उपचारका क्रममा मृत्यु भएको हो। प्रहरीले जिप चालकलाई नियन्त्रणमा लिएको छ।
सप्तरी– बोदेबर्साइन नगरपालिका–५ मा मोटरसाइकल दुर्घटनामा परी डाक्नेश्वरी नगरपालिका–५ का ३१ वर्षीय ओम प्रकाश चौधरीको मृत्यु भएको छ। गम्भीर घाइते उनलाई जीवन ज्योति अस्पतालमा लगिएको थियो, जहाँ उपचारको क्रममा उनको ज्यान गएको हो। मोटरसाइकलमा सवार अर्का व्यक्ति घाइते छन् र अस्पतालमै उपचार भइरहेको छ।
तीनै घटनाको अनुसन्धान जारी रहेको प्रहरीले जनाएको छ।
