लाईभ प्रदेश
तुलसीपुर , २ असार ।
दाङकाे तुलसीपुर–७ घुसेरीस्थित सागर पौडेलको गोठमा असार १ गते राति ११:३० बजे चट्याङका कारण आगलागी हुँदा ठूलो जनावर क्षति भएको छ।
टिनले छाएको दुईतले कच्ची घरमा लागेको आगोबाट २ भैंसी, ३ खसी, १ बाख्रा र १० कुखुरा जलेर मरेका छन् भने १ भैंसी घाइते भएको छ।
गोठ पूर्ण रूपमा जलेर नष्ट हुँदा करिब दश लाख रुपैयाँ बराबरको क्षति भएको अनुमान गरिएको छ। मानवीय क्षति भने भएको छैन।
अग्निनियन्त्रणका लागि पर्सेनी अस्थायी प्रहरी पोस्टबाट प्र.स.नि. देबिलाल अधिकारीको कमान्डमा प्रहरी टोली खटिएको थियो। दमकल, प्रहरी र स्थानीयको सहयोगमा बिहान २:३५ बजे आगो नियन्त्रणमा ल्याइएको हो।
