लाईभ प्रदेश
तुलसीपुर, ३० असार ।
दाङको तुलसीपुर –१३ रनियापुरमा सर्पले डसेर एक २२ महिनाका बालकको ज्यान गएको छ।
स्थानीय नुरज परियारका २२ महिनाका छोरा एनिस परियार सोमबार साँझ करिब ४:१५ बजे आफ्नै घरभित्र खेलिरहेको बेला अज्ञात प्रजातिको सर्पले बायाँ हातको हत्केलाको पछाडि भागमा डसेको प्रहरीले जानकारी दिएको छ।
सर्पको डसाइपछि बालकलाई तत्काल उपचारका लागि राप्ती प्रादेशिक अस्पताल, तुलसीपुर लगिएको थियो। अस्पतालमा उपचारको क्रममा साँझ ५:२५ बजे चिकित्सकले मृत घोषणा गरेका हुन्।
घटनाको समयमा बालककी आमा अनिता परियार जंगलमा च्याउ खोज्न गएको बताइएको छ। अस्पतालमा बालकको हजुरबुवा श्याम नेपालीको उपस्थिति रहेको थिए ।
घटनास्थलमा इलाका प्रहरी कार्यालय फुलवारीबाट प्रहरी नायब निरीक्षक (प्र.ना.नि.) रामसिंह धामीको कमाण्डमा दुई जना प्रहरीको टोली खटिएको थियो। बालकको शव हाल राप्ती प्रादेशिक अस्पतालमै राखिएको छ।
