लाईभ प्रदेश
घोराही–२, कार्तिक ।
धार्मिक तथा आध्यात्मिक क्षेत्र उत्तर बाहिनी, घोराही–७ सुख्वारमा धार्मिक एवं भौतिक संरचना निर्माणका साथै बटुकहरूको पठन–पाठनलाई मध्यनजर राख्दै उत्तर बाहिनी संस्कृत पाठशालाका प्रबन्धक प्रकाश भट्टराईको संयोजकत्वमा एक महत्वपूर्ण बैठक सम्पन्न भएको छ।
बैठकमा श्रीमद् भागवत ज्ञान महायज्ञ आयोजना गर्ने विषयमा विस्तृत छलफल गरिएको थियो। सो छलफलमा सामाजिक अगुवा भूपबहादुर दागी, घोराही–७ का वडा अध्यक्ष खोपीराम चौधरी, नागरिक समाज दाङका पूर्व संयोजक चन्द्रराज पन्थ, समाजसेवी उपेन्द्र पौडेल, सामाजिक व्यक्तित्व रविन ज्ञवाली, उद्योग वाणिज्य संघ दाङका पूर्व अध्यक्ष नारायण भुसाललगायत स्थानीय समाजसेवीहरूको उपस्थितिमा बृहत् रूपमा विचार–विमर्श भएको थियो।
बैठकले आगामी मंसिर ९ गतेदेखि १६ गतेसम्म श्रीमद् भागवत ज्ञान महायज्ञ आयोजना गर्ने निर्णय गरेको छ। साथै, आयोजनाको तयारीका लागि घोराही–७ का वडा अध्यक्ष खोपीराम चौधरीलाई मुल समिति संयोजक तथा उत्तर बाहिनीका प्रबन्धक प्रकाश भट्टराईलाई मुल सदस्य–सचिवका रूपमा चयन गरिएको छ।
