लाईभ प्रदेश
दाङ, २७ असाेज ।
नेपाल पत्रकार महासंघ दाङले घोराहीमा आयोजना गरेको ‘पत्रकारितामा एआई’ विषयक अभिमुखीकरण कार्यक्रम आज २७ गते साेमबार सम्पन्न भएकाे छ ।
साे कार्यक्रममा नेपाल पत्रकार महासंघका पूर्व अध्यक्ष विपुल पोख्रेलले प्रविधिको विकाससँगै पत्रकारले दक्षता र जिम्मेवारी दुवै बढाउनुपर्ने आवश्यकता औँल्याउनुभयो।
उहाँले भन्नुभयो, “एआईले समाचार संकलनदेखि सम्पादन र वितरणसम्मको काममा गति ल्याउँछ, तर यसको जिम्मेवार प्रयोगका लागि पत्रकार नै अग्रमोर्चामा हुनुपर्छ।”
त्यस अवसरमा महासंघका सचिव सविन प्रियासनले महासंघले देशभर एआई साक्षरता र डिजिटल दक्षता सम्बन्धी तालिम विस्तार गर्ने योजना बनाएको जानकारी दिनुभयो। उहाँका अनुसार, प्रदेश र जिल्लास्तरमा नियमित तालिम सञ्चालन गरिने तयारी भइरहेको छ ।
प्रेस काउन्सिल नेपालका निवर्तमान सदस्य शरद अधिकारीले एआई प्रयोगसँगै नीति तथा नियमन तत्काल निर्माण गर्नुपर्ने सुझाव दिनुभयो।
प्रशिक्षक अजय शर्माले एआईलाई पत्रकारको प्रतिस्पर्धी नभई सहयोगी उपकरणको रूपमा लिन आग्रह गर्दै, त्यसको सृजनात्मक र अनुसन्धानमुखी प्रयोग गर्नुपर्नेमा जोड दिनुभयो।
कार्यक्रममा महासंघ दाङका अध्यक्ष सन्तोष सुवेदीको अध्यक्षता, उपाध्यक्ष ओपेन्द्र बस्नेतको स्वागत मन्तव्य र सहसचिव प्रकाश चौधरीको सञ्चालन रहेको थियो।
कार्यक्रममा जिल्लाभरिका पत्रकारहरू सक्रिय रूपमा सहभागी भएका थिए।
