rita kc
तुलसीपुर, १५ फागुन ।
तुलसीपुर महोत्सवमा आज १५ औँ दिन चर्चित गायिका अणु चौधरी र गायक गोपाल नेपाल जिएम लगायतका कलाकारको प्रस्तुति रहने भएको छ । अणु आधुनिक गितसंगितको ‘क्वीन’ मानिनुहुन्छ । उहाँका ‘सैया’, ‘लजालु’, ‘पाउ के पावल’ लगायतका गित निकै चर्चित छन् ।
यस्तै चर्चित गायक गोपाल नेपाल जि.एमका ‘आइएममी गर २/४ हजार’, ‘मेरो माया उल्का भो’, ‘मेरो माया लयो आफन्तैले’ लगायतका गितहरु निकै चर्चित छन् । महोत्सवमा आज पनि दर्शकको उत्साहजनक सहभागीता हुने अपेक्षा गरिएको छ ।
महोत्सवको १४ औं दिन बुधबार दर्शकहरूको अभूतपूर्व भीड देखिएको थियो । महोत्सव सकिने अन्तिमतिर आउँदा दर्शकको उपस्थिति झनै बढ्दै गएको सांस्कृतिक संयोजक सन्तोष खड्काले बताउनुभयो । उहाँले आज पनि चर्चित कलाकारको दमदार प्रस्तुति रहने भएकाले हजारौँ दर्शकको सहभागीता हुने बताउनुभयो । उहाँका अनुसार आज चर्चित गायिका अणु चौधरी, गायक गोपाल नेपाल जिएमसंगै गायिका सुनिता परियार र स्थानीय कलाकारको पनि प्रस्तुति रहनेछ ।
तुलसीपुर चेम्बर अफ कमर्सको आयोजनामा भइरहेको महोत्सवमा व्यापारिक स्टल, कृषि प्रदर्शनी, बालउद्यान, सांस्कृतिक कार्यक्रम लगायत विविध आकर्षण समेटिएका छन् । महोत्सव मूल आयोजक समितिका अध्यक्ष ऋषिराज भण्डारीले दर्शकको उपस्थितिले उत्साह थपेको बताउनुभयो । उहाँले स्थानीय वस्तुको बजारीकरण र कला संस्कृतिको संरक्षणमा महोत्सवले ठुलो भूमिका खेलिरहेको बताउनुभयो । महोत्सव फागुन १६ गतेसम्म सञ्चालन हुनेछ ।
