rita kc
दाङको तुलसीपुर उपमहानगरपालिका–१४, भोजपुरस्थित बेलन्या डाँडा नर्सरी नजिक एक नवजात शिशुको शव खाल्डोमा गाडिएको अवस्थामा फेला परेको छ। शनिबार साँझ करिब ५:१५ बजे स्थानीय बासिन्दाले शव देखेपछि इलाका प्रहरी कार्यालयलाई खबर गरेका थिए।
घटनाको जानकारी पाउनासाथ प्रहरी निरीक्षक विनोद राज खत्रीको नेतृत्वमा प्रहरी टोली घटनास्थलमा खटिएको थियो। प्रारम्भिक अनुसन्धानमा शिशुको शव करिब २–३ दिनअघि गाडिएको देखिएको र कुकुर वा अन्य जनावरले खाल्डो खनेर शव बाहिर निकालेको आशंका गरिएको छ। शव फेला पर्दा शिशुको एउटा हात समेत कुकुरले खाइसकेको अवस्थामा रहेको बताइएको छ।
प्रहरीका अनुसार शव करिब ९ महिनाको गर्भावधि पूरा भएपछि जन्मिएको बालिकाको भएको अनुमान गरिएको छ। घटनास्थलमा प्रारम्भिक अनुसन्धानपछि साँझ ७:५० बजे शवलाई पोष्टमार्टमका लागि राप्ती प्रादेशिक अस्पताल, तुलसीपुर पठाइएको छ।
इलाका प्रहरी कार्यालय तुलसीपुरका प्रवक्ता प्रहरी निरीक्षक सूर्य रानाका अनुसार शिशु कसको हो भन्ने विषयमा अनुसन्धान जारी रहेको छ। घटनाले स्थानीय बासिन्दामा त्रास र आक्रोश फैलिएको छ।
