लाईभ प्रदेश
दाङ, २९ वैशाख
घोराही उपमहानगरपालिका क्षेत्रबाट प्रहरीले दुई फरक घटनामा लागुऔषधसहित दुई जनालाई पक्राउ गरेको छ।
पहिलो घटना घोराही-१४, मिलनचोकमा भएको हो। संकास्पद अवस्थामा हिँडिरहेका २३ वर्षीय विशाल बुढा मगरलाई प्रहरीले रोकजाँच गर्दा उनको पाइन्टको खल्टीमा राखिएको तीन वटा साना पुडियामा ब्राउन सुगरजस्तो देखिने खैरो धुलो पदार्थ फेला परेको हो। उक्त पदार्थको तौल प्लास्टिकसहित १ ग्राम र शुद्ध तौल ६७० मिलिग्राम रहेको प्रहरीले जनाएको छ।
दोस्रो घटनामा, घोराही-१३, आनन्दनगर टोलकी ५७ वर्षीया नितु आचार्यको घरमा खानतलासी गर्दा भान्सा कोठामा लुकाइ राखिएको २ पत्ता ट्रामाडोल (२० क्याप्सुल) फेला परेको प्रहरीले जानकारी दिएको छ।
दुवै घटनामा पक्राउ परेकामाथि थप अनुसन्धान भइरहेको जिल्ला प्रहरी कार्यालय दाङले जनाएको छ।
