लाईभ प्रदेश
तुलसीपुर, ३० वैशाख ।
दाङको टरिगाउँ एयरपोर्टलाई विस्तार गर्न प्रतिनिधिसभा सदस्य दीपक गिरीले आगामी आर्थिक वर्षको बजेटमा ३ अर्ब ४२ करोड रुपैयाँ माग गरेका छन्। संसदमा बोल्दै गिरीले हरेक वर्ष नीति तथा कार्यक्रममा एयरपोर्टको कुरा उठे पनि बजेटमा उपेक्षा हुने परिपाटी अन्त्य हुनुपर्ने बताए।
प्रधानमन्त्री केपी शर्मा ओलीले समेत संसदमा टरिगाउँ एयरपोर्ट र घोराही–तुलसीपुर फोरलेन सडक निर्माणको घोषणा गरेपछि सांसद गिरी उत्साहित देखिए। विमानस्थलको धावनमार्ग छोटो भएकाले ठूला जहाज अवतरण गर्न नसक्दा हवाई सेवा अनियमित हुने गरेको छ। हाल साढे ७ सय मिटर मात्रै कालोपत्रे भएको धावनमार्ग १९ सय मिटर पुर्याउनुपर्ने आवश्यकता रहेको छ।
स्थानिय सरकार, जनप्रतिनिधि र व्यवसायिक संघसंस्थाको निरन्तर पहलपछि एयरपोर्टमा इन्धन डिपो, टर्मिनल भवन र कन्ट्रोल टावर निर्माण भइसकेका छन्। अब केन्द्र सरकारको ठोस बजेटीय सहयोगले मात्र यस क्षेत्रको हवाई सेवा व्यवस्थित र भरपर्दो बन्ने जनप्रतिनिधिहरूको भनाइ छ।
