लाईभ प्रदेश
तुलसीपुर, जेठ २८ ।
दाङकाे तुलसीपुर –५ स्थित बसपार्कको प्रतिक्षालयमा जेठ २४ गते एक पुरूष मृत अवस्थामा फेला परेको जिल्ला प्रहरी कार्यालय दाङले जनाएको छ।
प्रहरीका अनुसार मृतक वर्ष अन्दाजी ४० देखि ४२ को उमेरका छन्। उनी नाम, थर तथा वतन नखुलेका व्यक्ति हुन्, जो विगत केही समयदेखि बजार क्षेत्रमा मागीखाई हिँड्ने गरेको बताइएको छ।
घटनास्थलमा जानकारी प्राप्त हुनासाथ इलाका प्रहरी पोस्ट बसपार्क तुलसीपुरबाट प्रहरी नायब निरीक्षक उज्वल शाहको कमाण्डमा ३ जना प्रहरी टोली खटिएको थियो। हालसम्म पनि मृतकको पहिचान खुल्न सकेको छैन।
प्रहरीले मृतकको पहिचान खुलाउन सहयोग गर्न आम सर्वसाधारणसँग अनुरोध गरेको छ। यदि कसैलाई मृतकसम्बन्धी जानकारी भएमा नजिकको प्रहरी कार्यालयमा जानकारी गराउन अनुरोध गरिएको छ।
