लाईभ प्रदेश
तुलसीपुर ५, साउन ।
दाङको तुलसीपुर उपमहानगरपालिका–८ गतेखोला पुल नजिकै आज गय दिउँसो ट्याक्टर र अटो एकआपसमा ठोक्किँदा चार जना घाइते भएका छन्।
दिउँसो ३:४५ बजे लु.प्र.०२–००१ त ००९३ नम्बरको ट्याक्टर पश्चिमबाट तुलसीपुरतर्फ आउँदै गर्दा अनियन्त्रित भई पल्टिएको थियो। सो क्रममा विपरीत दिशाबाट जाँदै गरेको रा.१.ह.७५०० नम्बरको अटोमा ट्याक्टरको ट्रली ठोक्किँदा अटोमा सवार यात्रुहरू घाइते भएका हुन्।
दुर्घटनामा अटो चालक तुलसीपुर–२ बालापुरका ३८ वर्षीय भीम बहादुर ठाडा मगर दुबै खुट्टामा सामान्य चोटसहित घाइते भएका छन्। त्यस्तै, भम्केकी १८ वर्षीया मनिषा योगीको टाउको, पेट र दायाँ खुट्टामा मध्यम प्रकारको भित्री चोट लागेको छ। उपचारको क्रममा उनीसँग उनकी दिदी गंगा योगी पनि संलग्न रहेकी छन्।
अर्की घाइते भम्केकी ३८ वर्षीया देवी शर्माको बाँया हात र दायाँ खुट्टामा सामान्य चोट लागेको छ भने २९ वर्षीया कल्पना केसी (धिताल)को मुख र खुट्टामा सामान्य चोट लागेको प्रहरीले जनाएको छ।
सबै घाइतेहरूको राप्ती प्रादेशिक अस्पताल तुलसीपुरमा उपचार भइरहेको छ।
ट्याक्टर चालक तुलसीपुर–१७ दुधरासका २९ वर्षीय राजेश परियारलाई ईलाका प्रहरी कार्यालय तुलसीपुरले नियन्त्रणमा लिएको छ। दुर्घटनाको जानकारी पाएलगत्तै प्र.स.नि. दिनेश बि.सीको कमाण्डमा प्रहरीको टोली घटनास्थलमा खटिएको थियो।
प्रहरीका अनुसार थप अनुसन्धान भइरहेको छ।
