लाईभ प्रदेश
तुलसीपुर ५, साउन ।
दाङको तुलसीपुर उपमहानगरपालिका–११ स्थित शितलपुरको क्रियाघर प्राङ्गणमा एक युवक मृत अवस्थामा फेला परेका छन्।
मृत फेला पर्ने युवकको पहिचान तुलसीपुर १२ स्थित कचिला निवासी २१ वर्षीय किरण खत्रीका रूपमा खुलेको छ। उनी मान बहादुर खत्रीका छोरा हुन्।
स्थानिय बासिन्दाले साउन ४ गते साँझ करिब ७ बजेतिर क्रियाघरको प्राङ्गणमा युवकको शव देखेपछि तत्कालै घटना सम्बन्धी जानकारी प्रहरी चौकी उरहरीलाई दिएका थिए।
जानकारी पाएपछि प्रहरी चौकी उरहरीबाट प्रहरी नायब निरीक्षक एक बहादुर खड्काको टोली घटनास्थलमा खटिएको थियो भने थप अनुसन्धानका लागि ईलाका प्रहरी कार्यालय तुलसीपुरबाट प्रहरी नायब उपरीक्षक अनिल ठकुरीको कमाण्डमा ७ जनाको प्रहरी टोली परिचालित गरिएको थियो।
परिवारजनका अनुसार किरण खत्री मिति २०८२ साल साउन ३ गते दिउँसो १२ बजे घरबाट निस्किएका थिए।
मृतकको शवलाई पोष्टमार्टमका लागि पठाइएको थियो र पोष्टमार्टम प्रक्रिया सम्पन्न भइसकेको प्रहरी स्रोतले जानकारी दिएको छ। घटनाबारे थप अनुसन्धान भइरहेको प्रहरीले जनाएको छ।
