लाईभ प्रदेश
दाङ, भदौ २०।
दाङको तुलसीपुर उपमहानगरपालिका–६ स्याउली बजारस्थित विष्णु नास्ता पसल नजिक आज बिहान खुकुरी प्रहार भएको छ। स्थानीय बसन्त बिकसहित ७–८ जनाको समूहले अचानक आक्रमण गर्दा दुई जना घाइते भएका छन्।
घाइतेमध्ये तुलसीपुर–५ बसपार्क बस्ने २१ वर्षीय आयुष बिकको टाउको र ढाडमा चोट लागेको छ। अवस्था मध्यम रहेकाले प्रारम्भिक उपचारपछि उनलाई थप उपचारका लागि नेपालगञ्जस्थित संजिवनी कलेज अफ मेडिकल साइन्सेस प्रा.लि.मा रिफर गरिएको प्रहरीले जनाएको छ।
त्यस्तै, अर्का घाइते १९ वर्षीय प्रवेश योगीको बायाँ हातमा सामान्य चोट लागेपछि उनलाई समेत संजिवनी कलेज, नेपालगञ्ज पठाइएको छ।
प्रहरीका अनुसार घटनामा संलग्न समूहलाई खोजी गर्ने क्रममा आज दिउँसो ३ः४५ बजे तुलसीपुर–४ रक्षा चौरबाट पाँच जनालाई नियन्त्रणमा लिइएको छ। पक्राउ पर्नेमा–
१. तुलसीपुर–६ गोलौरा बस्ने १८ वर्षीय जीवन बिक (पिता ज्ञानबहादुर कामी)
२. तुलसीपुर–६ बसपार्क बस्ने १८ वर्षीय राजेश परियार (पिता रामु परियार)
३. तुलसीपुर बस्ने १९ वर्षीय नविन राना (पिता दलबहादुर राना)
४. तुलसीपुर बस्ने १८ वर्षीय बसन्त परियार (पिता झखबहादुर परियार)
५. तुलसीपुर बस्ने १८ वर्षीय नवीन सुनार रहेका छन्।
इलाका प्रहरी कार्यालय तुलसीपुरका प्रनिः सूर्य बहादुर राना मगरको कमाण्डमा खटिएको प्रहरी टोलीले उनीहरुलाई नियन्त्रणमा लिएको र थप अनुसन्धान भइरहेको जनाएको छ।
