लाईभ प्रदेश
दाङ ।
डडेल्धुराबाट काठमाडौंतर्फ गइरहेको ना ८ ख ७४५५ नम्बरको यात्रुबस आज बिहान दाङमा दुर्घटनामा परेको छ। लमही नगरपालिका–१, कौडियापुल नजिकै पूर्व–पश्चिम राजमार्गको पुलबाट बस खोलामा खसेपछि दुर्घटना भएको जिल्ला प्रहरी कार्यालय दाङले जनाएको छ। घटना आज बिहान करिब ३ बजे भएको हो।
दुर्घटनामा २२ जना घाइते भएका छन्। प्रहरीका अनुसार घाइतेमध्ये डडेल्धुरा, बैतडी, कैलाली, प्युठान लगायतका विभिन्न स्थानका यात्रुहरू छन्। घाइतेहरूलाई लमही अस्पतालमा उपचारका लागि भर्ना गरिएको छ।
प्रहरी प्रवक्ता डिएसपी चक्रबहादुर शाहका अनुसार बसको पट्टा भाँचिएपछि नियन्त्रण गुमाएर दुर्घटना भएको प्रारम्भिक अनुमान गरिएको छ।
घटनामा संलग्न बस चालक ३६ वर्षीय राजेन्द्र कैनीलाई प्रहरीको नियन्त्रणमा लिइएको छ। बसमा कुल ३८ जना यात्रु सवार रहेको प्रहरीले जनाएको छ।
