लाईभ प्रदेश
दाङ, १३ पुस ।
दाङको तुलसीपुरमा जारी ‘प्रथम तुलसीपुर महोत्सवमा’ दिनप्रतिदिन रौनकता थपिदै गएको छ । महोत्सव अवलोकनका दैनिक हजारौँको संख्यामा सहभागी हुने गरेको छ ।
‘स्थानीय वस्तुको प्रवद्र्धन गरौँ, औद्योगिक वातावरणको सुधार–दिगो अर्थतन्त्रको आधार’ भन्ने नाराका साथ नेपाल घरेलु तथा साना उद्योग महासंघ तुलसीपुरको आयोजनामा महोत्सव सञ्चालन भइरहेको छ । पुस ४ गतेदेखि शुरु भएको महोत्सवको दशौँ दिनसम्म आइपुग्दा उल्लेख्यरुपमा सफलता पाएको महोत्सव मूल आयोजक समितिका संयोजक लाल बहादुर केसीले बताउनुभयो । दर्शकको सहभागीताले स्थानीय उत्पादनको बजारीकरण र पर्यटन प्रवद्र्धनसँगै कला, संस्कृतिलाई थप उचाइमा पुर्याएको उहाँले बताउनुभयो ।
महोत्सवमा दाङसहित छिमेकी जिल्ला रोल्पा, बाँके, रुकुम पश्चिम, रुकुम पूर्व, प्युठान लगायतका जिल्लाहरूबाट दर्शक अवलोकनका लागि आउने गरेका छन् । महोत्सवमा बढ्दै गएको दर्शकको उपस्थितिले आयोजकलाई थप हौसला मिलेको महोत्सव मूल आयोजक समितिका सदस्य सचिव भद्र बहादुर वलीले बताउनुभयो । भएको महोत्सव १९ गतेसम्म संचालन हुनेछ ।
महोत्सवमा आज दशौँ दिन चर्चित गायक प्रकाश दुतराजको सांगितिक प्रस्तुति रहने साँस्कृतिक संयोजक टिकाजंग वलीले बताउनुभयो । ‘घर कता हो बैनीको’ गितबाट चर्चामा आएका प्रकाशका थुप्रै गित निकै सुपरहिट रहेका छन् । साँस्कृतिक संयोजक वलीका अनुसार आज प्रकाश संगै कलावती केसी, थम्मन भण्डारी लगायतका कलाकारको प्रस्तुति रहनेछ । आजको कार्यक्रम संचालन सन्तोष केसीले गर्नुहुनेछ ।
