लाईभ प्रदेश
दाङ ६ बैशाख ।
दाङको देउखुरीमा हिजाे साँझ एक यात्रुबाहक बस दुर्घटना हुँदा दुई जनाको मृत्यु भएको छ भने दर्जनभन्दा बढी यात्रु घाइते भएका छन्। कृष्णनगरबाट तुलसीपुरतर्फ गइरहेको बा ३ ख ७९९६ नम्बरको बस राप्ती गाउँपालिका–५ लठह्वामा दुर्घटनामा परेको हो।
जिल्ला प्रहरी कार्यालय दाङका अनुसार दुर्घटनामा परी राजपुर गाउँपालिका–५ निवासी ५६ वर्षीय निलसरोज यादवको घटनास्थलमै मृत्यु भएको हो। अर्की मृत्यु हुनेमा घोराही उपमहानगरपालिका–३ झिङनी निवासी करिब ३०/३५ वर्षकी पुष्पा नेपाली रहेकी छिन्। उनको उपचारको क्रममा मृत्यु भएको वडा प्रहरी कार्यालय लमहीले जनाएको छ।
दुर्घटनामा १५ जना यात्रु घाइते भएका छन्। उनीहरूलाई सिसहनियाँ र लमहीका अस्पतालहरूमा उपचार भइरहेको छ। घाइतेमध्ये केहीको अवस्था गम्भीर रहेको प्रहरीले जनाएको छ।
घाइतेहरूमा लमही नगरपालिका–५ की २५ वर्षीया संगिता जिसी, घोराही उपमहानगरपालिका–५ की ५० वर्षीया चोपिकला खत्री र बलबहादुर खत्री, प्यूठान नगरपालिका–६ की २७ वर्षीया अनिशा गुरुङ, सुमित्रा गुरुङ र भावना गुरुङ, लमही नगरपालिका–४ की २४ वर्षीया रासु थापा, घोराही उपमहानगरपालिका–१० का ४२ वर्षीय ललित वली, कपिलवस्तु शिवराज नगरपालिका–२ की २८ वर्षीया सरस्वती घर्तीमगर र उनकी ४ महिनाकी छोरी रिया, शिवराजकै ४१ वर्षीया मनकुमारी घर्ती, प्यूठान नगरपालिका–३ का शिव बहादुर गुरुङका ५ वर्षीय छोरा प्रभास गुरुङ, लमही नगरपालिका–५ का २५ वर्षीय सहिद हुसेन र कपिलवस्तु नगरपालिका–४ की २३ वर्षीया शवनम नाउ रहेका छन्।
प्रत्यक्षदर्शीका अनुसार बस तीव्र गतिमा रहेको र अनियन्त्रित भई दुर्घटनामा परेको हो ।
