लाईभ प्रदेश
तुलसीपुर, २५ बैशाख ।
दाङको तुलसीपुरमा बुधबार साँझ एक कारको ठक्करबाट पैदल यात्री घाइते भएका छन्। साँझ करिब ७:२० बजे तुलसीपुर उपमहानगरपालिका–५ स्थित बी.पी. चोकमा कारले ठक्कर दिँदा ३७ वर्षीय ज्ञानेन्द्र के.सी. घाइते भएका हुन्।
बी.पी. चोकबाट बसपार्कतर्फ जाँदै गरेको प्र.३–०१–०२४ च ०५४६ नम्बरको कारले पैदल हिँडिरहेका के.सी.लाई ठक्कर दिएको थियो। दुर्घटनामा उनको टाउको र बायाँ खुट्टामा चोट लागेको प्रहरीले जनाएको छ। तत्कालै राप्ती प्रादेशिक अस्पतालमा भर्ना गरिएका घाइते के.सी.को अवस्था मध्यम रहेको छ।
घटनापछि २५ वर्षीय कार चालक शिवराज अधिकारीलाई प्रहरीले नियन्त्रणमा लिएको छ। हाल घटनासम्बन्धी आवश्यक अनुसन्धान जारी रहेको इलाका प्रहरी कार्यालय तुलसीपुरका प्रहरी निरीक्षक सूर्य रानाले जानकारी दिएका छन्।
