लाईभ प्रदेश
तुलसीपुर ३१, बैशाख ।
तुलसीपुर उपमहानगरपालिका–७ पर्सेनी खाद्रे सडकखण्डको बोगटीमा मंगलबार राति एक मोटरसाइकल दुर्घटना हुँदा दुई जना घाइते भएका छन्।
तुलसीपुरबाट खाद्रे जाँदै गरेको प्रदेश ३–०२–००८ प ३०३४ नम्बरको मोटरसाइकल अनियन्त्रित भई दुर्घटनामा परेको हो। इलाका प्रहरी कार्यालय तुलसीपुरका अनुसार चालक ३२ वर्षीय साजन बुढा मगर गम्भीर घाइते भएका छन्। उनको नाक, मुख, आँखा र टाउकोमा चोट लागेको छ।
बुढाले मादक पदार्थ सेवन गरेर सवारी चलाएको पुष्टि भएको छ। त्यस्तै, पछाडि सवार २३ वर्षीय रमेश घर्ती मगर पनि सामान्य घाइते भएका छन्। घर्तीले पनि मापसे गरेको प्रहरीले जनाएको छ।
गम्भीर घाइते बुढालाई नेपालगन्ज नर्सिङहोम रेफर गरिएको छ भने सामान्य घाइते घर्तीलाई उपचारपछि डिस्चार्ज गरिएको छ। दुर्घटनाबारे अनुसन्धान जारी छ र मोटरसाइकल प्रहरीको नियन्त्रणमा छ।
