लाईभ प्रदेश
तुलसीपुर ७ जेठ ।
दाङको तुलसीपुर उपमहानगरपालिका–१७ मजगैस्थित एक सुनचाँदी पसलमा अज्ञात समूहले बुधबार राति चोरी गरी १२ लाख रुपैयाँभन्दा बढीको धनमाल लगेका छन्।
बिजु सुनचाँदी उद्योगका सञ्चालक पदम सेर्पाइलीका अनुसार चोरीमा करिब ६ तोला सुन, २० तोला चाँदी र नगद पाँच हजार रुपैयाँ गरी करिब १२ लाख ३६ हजार बराबरको धनमाल हराएको छ।
सञ्चालक सेर्पाइलीले जानकारी दिएअनुसार, चोरीबारे बिहान ६ बजे छिमेकी टोपबहादुर बस्नेतका भाइबाट खबर पाएपछि थाहा भएको हो। पसल रहेको घरको गेट भित्रबाट मात्र चुक्कुल लगाइएकोले चोरले सजिलै हात छिराएर गेट खोल्न सफल भएको र त्यसपछि पसलको ताला फोडेर चोरी गरेको आशंका गरिएको छ।
हाल इलाका प्रहरी कार्यालय तुलसीपुरका प्रहरी निरीक्षक सूर्य रानाको नेतृत्वमा चोरीमा संलग्न व्यक्तिहरूको खोजी कार्य तीव्र रुपमा अगाडि बढाइएको छ।
