rita kc
तुलसीपुर १२ भदाै
तुलसीपुरमा सामाजिक सञ्जालको प्रभावबारे अन्तरक्रिया
निरला अर्याल
तुलसीपुर, १२ भदौ ।
तुलसीपुर नगर जेसीजको आयोजनामा र तुलसीपुर उपमहानगरपालिकाको समन्वयमा ‘सामाजिक सञ्जालको प्रयोगले युवामा पारेको प्रभाव’ विषयक अन्तरक्रिया कार्यक्रम गरिएको छ ।
जेसीज वर्ष २०२४ का अध्यक्ष पूर्ण विक्रम डाँगीको अध्यक्षतामा भएको उक्त कार्यक्रममा वरिष्ठ अधिवक्ता डिल्लीराज धितालले प्रमुख वक्ताको रूपमा प्रविधिको महत्त्व र यसको प्रयोगबारे धारणा व्यक्त गर्नुभयो ।
अधिवक्ता धितालले ६० प्रतिशत भन्दा बढी मानिसहरू प्रविधिको प्रयोगमा संलग्न रहेको उल्लेख गर्दै सामाजिक सञ्जालमा भएका कुराकानीहरू स्थायी रूपमा सुरक्षित रहने बताउनुभयो ।
१८ देखि ४० वर्षका व्यक्तिहरूका लागि सामाजिक सञ्जालले प्रगति ल्याए पनि यसको प्रयोगमा सावधानी अपनाउन आवश्यक रहेको उहाँले बताउनुभयो ।
कार्यक्रममा तुलसीपुर नगर जेसीजका पूर्व अध्यक्ष तथा कार्यक्रम वक्ता झरेन्द्र खरेलले सामाजिक सञ्जालले विश्वलाई एउटै समुदायमा जोड्न भूमिका खेलेको बताउनुभयो । उहाँले सामाजिक संजालले समाजमा सकारात्मक र नकारात्मक दुवै प्रभाव पार्ने उल्लेख गर्दै सकारात्मक प्रविधि प्रयोगको महत्त्वमा जोड दिनुभयो ।
त्यसैगरी, इलाका प्रहरी कार्यालय तुलसीपुरका प्रमुख ठाकुर पोख्रेलले १८ वर्षभन्दा कम उमेरका बालबालिकाहरूले फेसबुक र टिकटक जस्ता सामाजिक सञ्जालको प्रयोग गर्नु नहुनेमा जोड दिनुभयो । उहाँले सामाजिक सञ्जालको गलत प्रयोगले मानिसहरू मानसिक रूपमा विक्षिप्त बन्ने घटनाहरू बढेको बताउनुभयो ।
यस्तै ग्रेट अरनिको विद्यालयमा अध्ययनरत विद्यार्थी विनिता भण्डारीले प्रविधिको प्रयोगले पठनपाठनमा सहयोग पुगेको र नयाँ विषयवस्तु खोज अनुसन्धान गर्न तथा घरमा बस्दै खानेपानी, विद्युत्, टेलिफोनको बिल तिर्न सजिलो भएको बताउनुभयो ।
कार्यक्रममा तुलसीपुर उपमहानगरपालिकाका प्रमुख टीकाराम खड्काले ब्यानर पढेर कार्यक्रमको उद्घाटन गर्नुभएको हो । कार्यक्रममा ४ ओटा विद्यालयका १४५ जना विद्यार्थी तथा शिक्षकहरूको सहभागिता रहेको थियो ।कार्यक्रम संयोजक मधुसुदन गौतमले स्वागत मन्तव्य राख्नुभएको थियो भने कार्यक्रमको सहजीकरण जेसीजका महासचिव कमल प्रकाश शर्माले गरेका थियो ।
