लाईभ प्रदेश
काठमाडौँ, २९ श्रावण ।
देशभर मनसुनको प्रभाव जारी रहँदा यसको सक्रियता पूर्वको तुलनामा पश्चिमतर्फ बढी देखिएको छ। मौसम पूर्वानुमान महाशाखाका अनुसार मनसुनको न्यून चापीय रेखा तराई क्षेत्रमा अवस्थित छ भने पूर्वतर्फ यो रेखा तराईभन्दा केही दक्षिणतिर सरेको छ।
महाशाखाले दिएको जानकारीअनुसार आज दिउँसो गण्डकीदेखि पश्चिमका क्षेत्रमा भारी वर्षाको सम्भावना छ। विशेषगरी गण्डकी, लुम्बिनी, सुदूरपश्चिम र कर्णाली प्रदेशका पहाडी भागका एक–दुई स्थानमा ठूलो पानी पर्ने सम्भावना उच्च रहेको छ। त्यस्तै मधेश प्रदेशसहित केही अन्य क्षेत्रमा मध्यम वर्षा हुने अनुमान गरिएको छ।
रातिको समयमा गण्डकी प्रदेशका पहाडी तथा तराई क्षेत्र, साथै बागमती, लुम्बिनी र कर्णालीका पहाडी भूभागमा मध्यम खालको पानी पर्ने पूर्वानुमान छ।
महाशाखाले सतर्कता अपनाउन आग्रह गर्दै वर्षाका कारण पहाडी भूभागमा पहिरो र गेग्रान बहावको जोखिम रहने, ठूला–साना नदी, नाला र खोलामा पानीको सतह बढ्ने तथा यातायात व्यवस्थामा असर पर्न सक्ने चेतावनी दिएको छ।
